Ἄκουε δή, ἀξιάγαστε, αὐθεντικῶς καὶ αὐτοκρατορικῶς τοῦ πνεύματος προστάττοντος καὶ δρῶντος ἴσα τῷ πατρὶ καὶ τῷ υἱῷ. ἀφορίσατε δή μοι τὸν Βαρναβᾶν καὶ Σαῦλον εἰς τὸ ἔργον, ὃ προκέκλημαι αὐτούς, φησιν τοῖς ἀποστόλοις· συμφώνως δὲ τούτῳ ὁ υἱὸς τῷ Παύλῳ φησίν· εἴσελθε εἰς τὴν πόλιν, κἀκεῖ λαληθήσεταί σοι, (OM) τί σε δεῖ ποιεῖν· ἑτέρωθι δέ φασιν αἱ Πράξεις τῶν ἀποστόλων· οὗτοι μὲν ἐκπεμφθέντες ὑπὸ τοῦ πνεύματος κατῆλθον εἰς Σελεύκειαν· ὁμοίως ὁ υἱός φησιν· πορευθέντες μαθητεύσατε πάντα τὰ ἔθνη, ὁμοίως οἱ ἀπόστολοι· ἔδοξέν, φησιν, τῷ ἁγίῳ πνεύματι καὶ ἡμῖν μηδὲν ἄλλο ἐπιτίθεσθαι ὑμῖν πλὴν τῶν ἐπ’ ἀνάγκαις· ὁμοίως ὁ Παῦλός φησιν· λέγω δὲ οὐκ ἐγώ, ἀλλ’ ὁ κύριος γυναῖκα ἀπὸ ἀνδρὸς μὴ χωρίζεσθαι· διῆλθόν, φησιν, τὴν Φρυγίαν καὶ Γαλατικὴν χώραν κωλυθέντες ὑπὸ τοῦ πνεύματος λαλῆσαι τὸν λόγον ἐν τῇ Ἀσίᾳ.